Bakı Dövlət Universiteti Hüquq fakültəsi

BDU Hüquq fakültəsində bir sıra beynəlxalq ikili diplom proqramları qurulmuşdur.

1. "Avropa hüququ" magistratura ixtisaslaşması üzrə ikili diplom proqramı. Magistraturanın “Avropa hüququ” ixtisaslaşması BDU və Almaniyanın Vürzburq Universiteti arasında imzalanmış 2011 və 2014-cü il tarixli Memorandumlara əsasən qurulmuşdur. Tədrisin ingilis və alman dilində aparıldığı bu istiqamətdə artıq 2013-ci ildən ikili diplomların verilməsi həyata keçirilir. Bu vaxta qədər 65-dən çox BDU məzununa BDU diplomu ilə yanaşı, “Avropa hüququ” ixtisası üzrə Almaniyanın Vürzburq Universitetinin diplomları da verilmişdir.
2. Hüquq üzrə fəlsəfə doktoru elmi dərəcəsi almaq üzrə ikili diplom proqramı. 2018-ci ildə BDU və Almaniyanın Martin Lüter adına Halle-Vittenberq Universiteti arasında imzalanmış ikili diplom proqramı üzrə Müqaviləyə əsasən 5608.01 - "Mülki hüquq; sahibkarlıq hüququ; ailə hüququ; beynəlxalq xüsusi hüquq" sahəsində birgə doktorant hazırlığı həyata keçirilir. Belə ki, Sazişlə hüquq üzrə fəlsəfə doktoru proqramı üzrə 3 nəfər doktorantın qəbulunun həyata keçirilməsi nəzərdə tutulmuşdur ki, bu da gələcəkdə elm sahəsində beynəlxalq əməkdaşlığın daha da inkişafına təkan verəcəkdir. Hazırda bu istiqamətdə işlər uğurla davam etdirilir.
3. "Dəniz və enerji hüququ" magistratura ixtisaslaşması üzrə ikili diplom proqramı. “Dəniz və enerji hüququ” sahəsində BDU Hüquq fakültəsində ABŞ-ın Tüleyn Universiteti Hüquq fakültəsinin dəstəyi ilə qurulmuş elmi məktəb bazasında 2020-ci ildə BDU və Qazaxıstanın Əl-Fərabi adına Qazax Milli Universiteti ilə ikili diplom proqramı haqqında Müqavilə imzalanmışdır. Hazırda tədrisin ingilis dilində aparıldığı bu ikili diplom proqramı üzrə təhsil uğurla davam etdirilir.
4. "Əqli mülkiyyət hüququ" magistratura ixtisaslaşması üzrə ikili diplom proqramı. 2021-ci ilin aprel ayında BDU və Fransanın Lyon - 2 Universiteti arasında “Əqli mülkiyyət hüququ” magistratura ixtisaslaşması sahəsində ikili diplom proqramı üzrə Müqavilə imzalanmışdır. Artıq bu ildən fransız və ingilis dilində tədris aparılmaqla birgə kadr hazırlığına başlanılmışdır.
5. "İnsan hüquqları" və "Beynəlxalq iqtisadi hüquq" magistratura ixtisaslaşmalarında ikili diplom proqramlarının qurulması üzrə beynəlxalq əməkdaşlıq. BDU və Litvanın Vilnüs Universiteti arasında “İnsan hüquqları” magistratura ixtisaslaşması,  o cümlədən BDU və Almaniyanın Halle-Vittenberq Universiteti arasında "Beynəlxalq iqtisadi hüquq" magistratura ixtisaslaşması üzrə ikili diplom proqramlarının qurulması nəzərdə tutulmuşdur və bu istiqamətdə danışıqlar aparılır.